Sun. Oct 2nd, 2022

ජනතා අභිලාෂයන්වලට පයින් ගසා පොහොට්ටුවෙන් ජනාධිපතිවරයකු සහ අගමැතිවරයකු පත්කර රට ගෙන යාමට ආණ්ඩුව කටයුතු කරමින් සිටින බව විපක්ෂයේ ප්‍රධාන සංවිධායක පාර්ලිමේන්තු මන්ත්‍රී ලක්ෂ්මන් කිරිඇල්ල මහතා කොළඹදී අද(15)පැවසීය.

ත්‍රෛනිකායික මහ නාහිමියන් ඇතුළු ආගමික නායකයින්ගේ උපදෙස් මත පාර්ලිමේන්තුවේ සියලුම පක්ෂ හා එක්ව සර්ව පාක්ෂික ආණ්ඩුවක් පිහිටුවා ජනතා අභිලාෂයන් ජයගැනීමට සමගි ජන බලවේගයේ කටයුතු කළත් ආණ්ඩුව එයට එකඟ නොවීම හේතුවෙන් බරපතළ තත්ත්වයක් පැන නැගී ඇතැයි ද කිරිඇල්ල මහතා සඳහන් කළේය.

ජනාධිපති සහ අගමැති ධුර ආණ්ඩුව සහ විපක්ෂය බෙදාගෙන රට ගොඩනැගීමට දේශපාලන පක්ෂ සමඟ ඊයේ තිබූ සම්මුතිය අද වන විට බිඳ වැටී ඇතැයි ද කොළඹ මාක්ස් ප්‍රනාන්දු මාවතේ විපක්ෂ නායක කාර්යාලයේ කැඳවූ මාධ්‍ය හමුවකදී ඔහු මේ බව පැවසීය.

පසුගිය දින කිහිපය තුළ විපක්ෂයේ පක්ෂ මේ සම්බන්ධයෙන් එකඟතාවයකට පැමිණ මෙම තීරණය අද දින කතානායක වරයාට දැනුම් දීමට සැලසුම් කර තිබුනත් අවසන් අවස්ථාවේදී කිහිපදෙනෙකුගේ ස්ථාවරය වෙනස් වීමෙන් මෙම ව්‍යාකූල තත්වය හටගෙන ඇතැයිද කිරිඇල්ල මහතා සඳහන් කළේය.